FHDYo hujjatlari o'zgardi yoxud kirill yozuviga qaytmaslik haqida

Yaqinda O'zA saytining kirill yozuviga asoslangan versiyasi ham ishga tushgandan keyin, ko'pchilik "Nahotki kirill yozuviga yana qaytsak?!" degan savolni o'rtaga tashlagan va bu internetdagi ijtimoiy tarmoqlarda (asosan Facebook, Twitter) ancha muhokama bo'lgandi.

Men o'shandayoq o'z pozitsiyamni aytgandim - ya'ni lotin yozuviga bosqichma-bosqich o'tamiz, kirill yozuviga qaytish ehtimoli 1% dan kamroq. Bunga asos qilib yaqinda davlat ramzlariga o'zgartirish kiritish haqidagi qonun qabul qilinganligi va unga ko'ra gerbimizdagi "ЎЗБЕКИСТОН" yozuvi "O'ZBEKISTON"ga o'zgartirilganini aytgandim.

Kirill yozuviga qaytish haqidagi tahminlar asossiz ekanligi kuni-kecha yana bir bor o'z isbotini topdi. 2012-yil 23-oktabr kuni Adliya Vazirining "Fuqarolik holati dalolatnoma yozuvlarining shakllari va ularni to'ldirish bo'yicha qoidalarni tasdiqlash haqida"gi buyrug'i chiqdi. Unga ko'ra FHDYo organidagi barcha hujjat shakllari lotin yozuvida bo'lishi belgilab berildi.

Shuningdek, buyruqda hududlardagi barcha Adliya boshqarmalariga FHDYo organlari xodimlariga joriy yilning noyabr-dekabr oylari davomida lotin yozuviga asoslangan o'zbek alifbosini mukammal o'rgatish bo'yicha chora-tadbirlarni ko'rish vazifasi yuklatildi.

Kirill yozuviga asoslangan amaldagi barcha hujjat shakllari (shablonlar) 2013-yilning 1-yanvaridan o'z kuchini yo'qotgan deb topiladi, ya'ni 2013-yil 1-yanvardan boshlab barcha turdagi fuqarolik holati dalolatnomalari (tug'ilganlik haqida, nikoh tuzilganlik haqida, nikohdan ajralganlik haqida, o'lim haqida) lotin yozuvida to'ldiriladi.

TATUga yangi talabalar turar joyi binosi berildi

TATU binosi | talaba.zn.uz

2012-yil 16-oktabr kuni O’zbekiston Respublikasi Vazirlar Mahkamasining “Aloqa va axborotlashtirish sohasi tashkilotlarining moddiy-texnika bazasini yanada mustahkamlash chora-tadbirlari to‘g‘risida”gi qarori qabul qilindi.

Mazkur qaror davlat aktivlarini boshqarishni yanada maqbullashtirish, aloqa va axborotlashtirish sohasi tashkilotlariga yuklangan vazifalar samarali bajarilishi uchun qulay shart-sharoitlar yaratish, ularning moddiy-texnika bazasini mustahkamlash maqsadida qabul qilindi.

Qarorning eng diqqatga sazovor joylari haqida to’xtalib o’tsam:

O’zbekiston aloqa va axborotlashtirish agentligi, O’zbekiston Respublikasi Davlat mulki qo‘mitasi, Toshkent viloyati hokimligi va «O’zbektelekom» aksiyadorlik kompaniyasining ma’lum bir binolari tegishli tartibda boshqa muassasa va tashkilotlarga o’tkazib berildi.

Xususan,

·           baholash tashkiloti tomonidan aniqlanadigan qiymat bo‘yicha davlat ulushini ko‘paytirish hisobiga quyidagi ro‘yxat bo‘yicha mol-mulkni «O’zbektelekom» aksiyadorlik kompaniyasining ustav fondiga berildi:

T/r	Bino va inshootlar manzili	Umumiy maydoni (kv. m)	Balansda saqlovchi (Berayotgan tomon)	Izoh
1.	Toshkent shahri, Navoiy ko‘chasi, 28 «A»	4 827	O’zbekiston aloqa va axborotlashtirish agentligi	Ma’muriy bino, shuningdek O’zbekiston aloqa va axborotlashtirish agentligi tomonidan aniqlanadigan ro‘yxat bo‘yicha tovar-moddiy boyliklar beriladi.
2.	Chirchiq shahri, P. Yusupov ko‘chasi, «3A»	1 083,51	Chirchiq shahri hokimligi
3.	Chirchiq shahri, 9-mikrorayon, 50-yillik shoh ko‘chasi	3 404,09	Chirchiq shahri hokimligi

·           Toshkent shahar, Shayxontohur ko‘chasi, 2-uyda joylashgan umumiy maydoni 2 677 kv. m bo‘lgan, «O’zbektelekom» aktsiyadorlik kompaniyasining mulkida bo‘lgan binoni davlat mulki sifatida, tasarruf etish huquqisiz Davlat aloqa inspeksiyasiga bepul berildi;

·           Toshkent shahar, Amir Temur ko‘chasi, 119-uyda («A» korpus) joylashgan, umumiy maydoni 6 495 kv.m bo‘lgan binoni Davlat aloqa inspeksiyasi balansidan tasarruf etish huquqisiz Toshkent axborot texnologiyalari universitetiga bepul berildi;

·           Toshkent shahar, Amir Temur ko‘chasi, 119-uyda («B» korpus) joylashgan, umumiy maydoni 573 kv.m bo‘lgan binoni Davlat aloqa inspeksiyasi balansidan tasarruf etish huquqisiz Madaniyat va sport ishlari vazirligi huzuridagi Badiiy jamoalar ijodiy birlashmasiga bepul berish to‘g‘risidagi taklifiga rozilik berilsin.

O’zbekiston aloqa va axborotlashtirish agentligiga ushbu qaror 1-bandining to‘rtinchi xatboshida ko‘rsatilgan binoni Toshkent axborot texnologiyalari universitetining talabalar turar joyi sifatida moddiy-texnik ta’minlashni, uni xayriya mablag‘lari va qonun hujjatlarida taqiqlanmagan boshqa manbalar hisobiga mukammal ta’mirlash vazifasi yuklatildi.

Shuningdek, qarorda quyidagilar belgilandi:

O’zbekiston aloqa va axborotlashtirish agentligining markaziy apparati va Radiochastotalar bo‘yicha davlat komissiyasi Toshkent shahar, Amir Temur shohko‘chasidagi 4-uyda;

Axborot-kommunikatsiya texnologiyalarini rivojlantirish jamg‘armasi Toshkent shahar, Navoiy ko‘chasidagi 28a-uyda joylashadi.

O’rindoshlik asosida ishlash hisoblanmaydigan ishlar ro’yhati tasdiqlandi

2012-yil 18-oktabr kuni O’zbekiston Respublikasi Vazirlar Mahkamasining “O’rindoshlik asosida hamda bir necha kasbda va lavozimda ishlash tartibi to‘g‘risidagi nizomni tasdiqlash haqida” qarori qabul qilindi.

Mazkur qaror fuqarolarning o‘rindoshlik asosida hamda bir necha kasbda (lavozimda) ishlashini yanada tartibga solish, shuningdek aholi daromadlarini ko‘paytirish uchun shart-sharoitlar yaratish maqsadida chiqarilgan.

Ushbu qarordagi eng e’tiborga molik jihatlari haqida siz bilan o’rtoqlashmoqchiman:

Davlat va xo‘jalik boshqaruvi organlarida, shu jumladan o‘rindoshlik asosida bir vaqtning o‘zida ikkita rahbarlik lavozimini egallashga yo‘l qo‘yilmaydi, qonun hujjatlarida belgilangan hollar bundan mustasno.

Manfaatdor davlat boshqaruvi organlari byudjet tashkilotlarining bir necha kasbda (lavozimda) ishlaganligi, xizmat ko‘rsatish doirasi kengayganligi yoki bajariladigan ishlar hajmi ortganligi uchun qo‘shimcha haq belgilanishi mumkin bo‘lgan xodimlari kasblari (lavozimlari) ro‘yxatini ikki oy muddatda ishlab chiqishi hamda O’zbekiston Respublikasi Moliya vazirligi hamda Mehnat va aholini ijtimoiy muhofaza qilish vazirligi bilan kelishgan holda tasdiqlashi belgilab qo’yildi.

Shuningdek, qaror asosida qabul qilingan “O’rindoshlik asosida hamda bir necha kasbda va lavozimda ishlash tartibi to‘g‘risida” NIZOMda quyidagi asosiy tushunchalardan foydalanilgan:

asosiy ish joyi - O’zbekiston Respublikasi Mehnat kodeksining 81-moddasiga muvofiq ish beruvchi tomonidan xodimning mehnat daftarchasi yuritiladigan tashkilot;

o‘rindoshlik asosida ishlash – xodimning o‘zining asosiy ishini bajarishidan tashqari asosiy ishidan bo‘sh vaqtida mehnat shartnomasi asosida boshqa haq to‘lanadigan ishni bajarishi.

Quyidagilarning o‘rindoshlik asosida ishlashi taqiqlanadi:

-      o‘n sakkiz yoshga to‘lmagan shaxslar;

-      agar shaxsning asosiy ishi mehnatning noqulay shart-sharoitlari bilan bog‘liq bo‘lsa, shunday shart-sharoitdagi ishlarda ishlash;

-      O’zbekiston Respublikasi Prezidenti Devoni va Vazirlar Mahkamasi apparati xodimlari, davlat boshqaruvi organlari rahbarlari, ularning o‘rinbosarlari va tarkibiy bo‘linmalar boshliqlari, Qoraqalpog‘iston Respublikasi Vazirlar Kengashi Raisi va a’zolari, O’zbekiston Respublikasi Prezidenti va O’zbekiston Respublikasi Vazirlar Mahkamasining qarorlarida nazarda tutilgan hollar bundan mustasno;

-      viloyatlar, tumanlar va shaharlar hokimlari va ularning o‘rinbosarlari;

-      bir-biriga bo‘ysunuvchi yoki bir-birining nazoratidagi tashkilotlarda davlat boshqaruvi organlari mutaxassislari - sog‘liqni saqlashni boshqarish organlarida band bo‘lgan vrachlar va ta’limni boshqarish organlarida band bo‘lgan o‘qituvchilar bundan mustasno;

-      qonun hujjatlariga muvofiq o‘rindoshlik asosida ishlashi taqiqlangan boshqa shaxslar (xodimlar).

Xodimning asosiy ish joyi hisoblangan tashkilotda o‘rindoshlik asosida ishlashga vaqtincha bo‘lmagan xodimning ishini bajarishda yoki bo‘sh lavozimdagi ishni bajarishda yo‘l qo‘yiladi.

O’rindoshlik asosida boshqa tashkilotga ishga kirayotgan shaxslar:

-      pasportni yoxud uning o‘rnini bosadigan hujjatni;

-      mehnat daftarchasi o‘rniga asosiy ish joyidan O’zbekiston Respublikasi Mehnat va aholini ijtimoiy muhofaza qilish vazirligi tomonidan tasdiqlanadigan shakl bo‘yicha ma’lumotnomani takdim etishi shart.

O’rindoshlik asosida ishlash uchun ish beruvchining, asosiy ish joyidan kasaba uyushmasi qo‘mitasining (xodimlarning boshqa vakillik organining) yoki boshqa organning roziligi talab qilinmaydi.

Bajarilishi uchun faqat qonun hujjatlariga muvofiq muayyan ish stajiga ega bo‘lgan shaxslar qo‘yilishi mumkin bo‘lgan ishga o‘rindoshlik asosida qabul qilishda asosiy ish joyidagi mehnat daftarchasining tasdiqlangan nusxasi taqdim etiladi.

O’rindoshlik asosida ishlashning davomiyligi xodimlarning ushbu toifasi uchun belgilangan ish vaqti normasining yarmidan ortiq bo‘lishi mumkin emas.

Xodim asosiy ish joyidagi mehnat majburiyatlarini bajarishdan ozod bo‘lgan kunlarda u o‘rindoshlik asosida to‘liq ish kunida ishlashi mumkin.

Xodim bilan o‘rindoshlik asosida ishlash uchun tuziladigan mehnat shartnomasida O’zbekiston Respublikasining Mehnat kodeksida belgilangan talablar bilan birgalikda ish vaqtining davomiyligi majburiy tartibda ko‘rsatiladi.

Xodimning yozma arizasiga ko‘ra, o‘rindoshlik asosidagi ish joyidan berilgan ma’lumotnoma asosida ish beruvchi tomonidan xodimning asosiy ish joyidagi mehnat daftarchasiga ish davri ko‘rsatilgan holda o‘rindoshlik asosidagi ish to‘g‘risidagi yozuv kiritiladi.

O’rindoshlik asosida ishlovchi shaxslarga har yilgi asosiy, shuningdek o‘rindoshlar haqli bo‘lgan qo‘shimcha ta’tillar asosiy ish joyidagi har yilgi mehnat ta’tili bilan bir vaqtda beriladi.

O’rindoshlar o‘rindoshlik asosidagi ish joyi bo‘yicha vaqtincha mehnatga layoqatsizlik nafaqasi olish, ayollar esa, bundan tashqari, homiladorlik va tug‘ish nafaqalari olish huquqiga egadir.

O’rindoshlik asosida ishlash hisoblanmaydigan ishlar

RO’YXATI

1.       Ilmiy faoliyatni yoki o‘qituvchilik faoliyatini amalga oshirish, agar bunday faoliyat asosiy ish joyi bo‘yicha bajariladigan ish hisoblanmasa.

2.   Fan, adabiyot va san’at asarlari yaratish.

3.   Xodim tomonidan, asosiy ishdan tashqari, o‘sha tashkilotning o‘zida shtat lavozimini egallamasdan boshqa ishni bajarish, shu jumladan:

umumta’lim maktablari o‘qituvchilari hamda kasb-hunar kollejlari va akademik litseylar o‘qituvchilari tomonidan kabinetlarga, laboratoriyalarga mudirlik qilish bo‘yicha vazifalarni bajarish, to‘garaklarga rahbarlik qilish, shuningdek ular tomonidan belgilangan yuklamadan ortiq o‘quv-tarbiyaviy ishlarni bajarish;

ishning ushbu turi bo‘yicha ish vaqti normal davom etishining 50 foizidan ortiq bo‘lmagan hajmda mehnatga soatbay haq to‘lanadigan pedagogik ish;

ta’lim muassasalari rahbarlarining o‘qituvchi lavozimi bo‘yicha yillik ish rejasida (ish vaqti normasi bilan) nazarda tutilgan jami ish vaqtining 50 foizidan ortiq bo‘lmagan hajmda o‘qituvchilik ishi;

tashkilotlar muhandis-texnik xodimlarining talabalar va o‘quvchilarning ishlab chiqarish ta’limi va amaliyotiga rahbarlik qilish bo‘yicha ishi;

tibbiyot xodimlarining belgilangan vaqt normasidan ortiqcha navbatchilik qilishi;

Hukumat qarorlari bilan xodimning ish haqiga ustamalar belgilangan vazifalarni bajarish.

4.   Mualliflik gonorari shaklida haq to‘lanadigan adabiy ish, shu jumladan alohida asarlarni tahrir, tarjima qilish va ularga taqriz yozish bo‘yicha ishlar.

5.       Mehnatga bir marta haq to‘langan holda texnik, tibbiy, buxgalteriya, huquqiy va boshqa ekspertiza (maslahat berish).

6.   Umumta’lim maktablari va maktabdan tashqari ta’lim muassasalari o‘qituvchilari, o‘rta maxsus, kasb-hunar ta’limi muassasalari ustalari, maktabgacha ta’lim muassasalarining pedagog xodimlari, ta’lim muassasalari kontsertmeysterlari va akkompaniatorlarining aynan bir ta’lim muassasasidagi o‘quv yuklamasining belgilangan normasidan ortiqcha ishi.

7.       Sog‘liqni saqlash muassasalarida oyiga 24 soatdan ortiq bo‘lmagan hajmda, mehnatga bir marta yoki soatbay haq to‘langan holda, tibbiyot maslahatchilari vazifalarini bajarish.

8.       Ilmiy-tadqiqot muassasalarida va oliy ta’lim muassasalarida ushbu ta’lim muassasalari shtatida turmagan ilmiy xodimlar tomonidan katta ilmiy xodimlarga - izlanuvchilarga rahbarlik qilish.

9.   Xodim tomonidan siyosiy partiyalar, kasaba uyushmalari va jamoat birlashmalari markaziy va hududiy organlarining saylab qo‘yiladigan lavozimlarida rahbar xodim, Kuzatuvchi kengash yoki Direktorlar (boshqaruvchilar) kengashi raisi yoki a’zosi, Mahsulot taqsimotiga oid bitim doirasida qo‘mitani boshqaruvchi, ishonchli boshqaruvchi yoki tashkilotda davlatning ishonchli vakili sifatida bajariladigan ish.

10.Jamoatchilik asosida bajariladigan ishlar.

Izoh: 2-bandda, 3-bandning ikkinchi va uchinchi xatboshilarda, shuningdek 4, 5, 7, 9 va 10-bandlarda ko‘rsatilgan ishlarni asosiy ish bo‘yicha ish vaqtida bajarishga yo‘l qo‘yilmaydi. Ishlarning boshqa turlari ishlarning xususiyatiga ko‘ra ham asosiy ish vaqtida, ham undan tashqari vaqtda bajariladi.

2013-yil 25-dekabrgacha Respublikadagi Geografik ob’ektlarning nomlari xatlovdan o’tkaziladi va maqbullashtiriladi

Photo: "Moy gorod. Tashkent" dasturidan

2012-yil 16-oktabr kuni «Geografik ob’ektlarning nomlari to‘g‘risida»gi O’zbekiston Respublikasi Qonuniga muvofiq geografik ob’ektlarning nomlari sohasidagi ishlarni tartibga solish chora-tadbirlari haqida O’zbekiston Respublikasi Vazirlar Mahkamasining qarori qabul qilindi.

Mazkur qarorda geografik ob’ektlarni nomlash va qayta nomlash tartibi batafsil yoritilgan. Unga ko’ra Respublika va hududlar miqyosida maxsus komissiyalar tashkil etilib, ularning zimmasiga bir qator vazifalar yuklatildi.

Xususan, geografik ob’ektlarni nomlash va qayta nomlash bo‘yicha takliflar ularning geografik ob’ektlarning nomlari to‘g‘risidagi qonun hujjatlari talablariga muvofiqligi yuzasidan davlat ekspertizasidan o‘tkaziladigan bo’ldi.

Shuningdek, geografik ob’ektlarning tarixiy-madaniy meros, O’zbekiston xalqining ma’naviy-etnik qadriyatlari bilan bog‘liq nomlarini asrash, ularni asossiz qayta nomlashning oldini olish kerakligi ta’kidlandi.

Qarorda geografik ob’ektlarni O’zbekiston xalqining milliy an’analari va mentalitetiga yot bo‘lgan nomlar bilan qayta nomlashga va ularga nom berishga yo‘l qo‘ymaslik, geografik ob’ektlarni nomlash va qayta nomlashda mahalliychilik, oshna-og‘aynigarchilik, xizmat martabasini suiiste’mol qilish hollarini istisno qilish kerakligi alohida belgilab qo’yildi.

Shuningdek, geografik ob’ektlarni odamlarning ismlari bilan, shuningdek tarixiy voqealar sharafiga nomlash va qayta nomlash sohasida belgilangan cheklovlarga rioya qilinishi aytilgan. Ammo qanday cheklovlar haqida gap borayotgani qarorda ko’rsatilmagan.  

Respublika komissiyasi zimmasiga yana mahalliy aholining geografik, tarixiy, milliy, etnik, tilga oid va boshqa xususiyatlarini o‘rganish hamda hisobga olish, bir ma’muriy-hududiy birlik doirasida geografik ob’ektlarga bir xil nomlar berilishiga yo‘l qo‘ymaslik kabi vazifalar ham yuklatilgan.

Mazkur qarorga asosan, Qoraqalpog‘iston Respublikasi Vazirlar Kengashi, viloyatlar, tumanlar va shaharlar hokimliklari O’zbekiston Respublikasi «Yergeodezkadastr» davlat qo‘mitasi bilan birgalikda 2013 yil 25 dekabrgacha «Geografik ob’ektlarning nomlari to‘g‘risida»gi O’zbekiston Respublikasi Qonunining 4-moddasi talablariga muvofiq rasmiy kartografiya va ma’lumotnoma nashrlari, statistika, arxiv, tarixiy va boshqa manbalar ma’lumotlari asosida tumanlar, shaharlar, posyolkalar, qishloqlar, ovullar, aholi punktlari hamda ularning tarkibiy qismlari nomlarini xatlovdan o‘tkazish va maqbullashtirish ishlarini amalga oshirishi belgilab berildi.

Qaror ta’lim tizimini ham cheklab o’tmadi. Unga ko’ra, O’zbekiston Respublikasi Iqtisodiyot vazirligi, Oliy va o‘rta maxsus ta’lim vazirligi belgilangan tartibda Vazirlar Mahkamasiga 2014/ 2015 o‘quv yilidan boshlab, 5440500 «Geografiya» ta’lim yo‘nalishlari asosida «Toponimika» mutaxassisligi bo‘yicha magistraturada kadrlar tayyorlashni boshlash to‘g‘risida takliflar kiritadigan bo’ldi.

3 oy muddatda Respublika “Yergoedezkadastr” davlat qo’mitasi ga Geografik ob’ektlar nomlari davlat reestrini tuzish va yuritis borasidagi ma’lumotlarning electron bazasini yaratish vazifasi yuklatildi.

Eslatib o’taman, Respublika komissiyasiga uning raisi hisoblanadigan O’zbekiston Respublikasining Bosh vaziri boshchilik qiladi.

Osiyo Chempionlari bilan ilk uchrashuv

Kecha, 12-oktabr kuni, poytaxtimizdagi muhtasham “Yoshlar ijodiyoti saroyi”da “O’zbekiston madaniyati va san’ati forumi” jamg’armasining yoshlarga qaratilgan grantlari g’oliblarini taqdirlash marosimi bo’lib o’tdi. Tadbirda “Iqtidorli talabalar uchun stipendiyalar dasturi” va “Ta’lim grantlari” dasturi g’olibi bo’lgan 237 nafar talabaga diplomlarni loyiha muallifi Gulnora Karimova topshirdi.

Shuningdek, kecha xabar berib o’tganimdek, ushbu tadbirda yaqindagina Osiyo chempionatida muvaffaqiyatli ishtirok etib, yurtimizdagi millionlab futbol muxlislariga olam-olam quvonch ulashgan hamda vatanimizga chempion bo’lib qaytib kelgan o’smirlar terma jamoamiz a’zolari ham Fond Forumning qimmatbaho esdalik sovg’alari bilan taqdirlandi. Aytish joizki, mazkur tadbir chempionlarimiz bilan bo’lgan ilk rasmiy uchrashuv va taqdirlash marosimidir. Aslida, bu ukalarimiz bundanda katta mukofotlarga loyiq va umid qilaman, yo’q, ishonamanki, ular bunday mukofotlar bilan hali taqdirlanishadi ham.

Taqdirlash marosimi onlayn tarzda mamlakatimizning deyarli barcha viloyatlariga uzatildi. 11 ta viloyat (Toshkent viloyatidan tashqari) va Qoraqalpog’iston Respublikasidagi “Kelajak ovozi” yoshlar tashabbuslari markazi faollari mazkur tadbirning barcha quvonchli onlaridan bahramand bo’lib turishdi hamda g’oliblarimizni onlayn tarzda qo’llab-quvvatlashdi.

Taqdirlash marosimiga jahon tan olgan hakamimiz Ravshan Ermatov ham tashrif buyurdi. Osiyoning 4 karra eng yaxshi hakami Fond Forum grantlari g’oliblariga diplom, o’smirlar terma jamoasi a’zolariga esa esdalik sovg’alarini Gulnora Karimova bilan birgalikda topshirdi.

Sovg’alar topshirib bo’lingach, Gulnora opa yana bir bor o’smirlarimizni tabriklab, o’z fikrlarini bildirib o’tdi:

-  Rostini aytsam, men O’zbekiston terma jamoasi chempion bo’lganini eshitganimda va ushbu taqdirlash marosimi oldidan ularni katta, baquvvat, haybatli yigitlar bo’la kerak deb o’ylagandim. Xozir ko’rib turibmanki, ular hali juda yosh, ko’zlarida bolalik quvonchi anqib turibdi. Ularni ko’rib men ham zavqlanib ketdim. Twitterda yozganimdek, sizlarga kelgusi yili bo’ladigan Jahon Chempionatida ham muxlislik qilamiz va g’alabalar yor bo’lishini tilab qolamiz.

G'oliblar quvonchi | Photo: F. Isamukhammedov

Har doimgidek, tadbirning badiiy qismida “Kelajak ovozi” YTMning iqtidorli yoshlari, shuningdek o’zbek estradasi vakillari – Jahongir Poziljonov hamda Bahtiyor Rahmanovlar yig’ilganlarni o’z chiqishlari bilan xushnud etishdi.

Rasmiy qism tugadi.

Buyog’i o’zimizni jaydaricha gaplar:

Xullas, anavi san’atkorlar chiqishi haqida.

Shaxsiy izoh:

 “Kelajak ovozi” faollaridan tashkil topgan musiqiy jamoa va yosh xonandalar hamda Bahtiyor Rahmanov o’z qo’shiqlarini jonli ijro etishdi. Jahongir Poziljonov esa… Oma lekinchi, Jahongir Poziljonov fonogrammani faqat bitta joyini yaxshi o’xshatayabdi xolos – qo’shiq aytmasdan, jim turadigan joyini. Unda ham bilmasdan gapirib qo’yayapti gohi-gohida :)

Tadbirdan so’ng, Ravshan aka bilan ko’rishib, ikki og’iz suhbatini oldim. To’g’risini aytsam, Ravshan aka meni eslay olmasa kerak, o’zimni tanishtiraman deb o’ylagandim, ammo adashgan ekanman. Akani xotirasiga qoyil qoldim!

Ravshan aka o’smirlar terma jamoasi vakillari bilan ham suhbatlashdi. Ularni tabrikladi, ularga o’z maslahatlarini berdi. Xususan, quyidagi fikrlarni ta’kidlab o’tdilar:

-  Qoyil, tabriklayman. Yaponiyani yutish osonmasdi lekin, kuchli jamoa edi. Bu uzoq yo’lning birinchi qadami xolos. Endi bundan buyog’iga xotirjamlikka berilmasdan, yulduzlik kasaliga chalinmasdan, yerda yurish kerak, a? (muallif izohi: shu joyida bratan kulib qo’ydilar). Xudo xohlasa, o’shanda hammasi yaxshi bo’ladi.

Shuningdek, o’smirlar terma jamoasi a’zosi, Osiyo chempionatining eng birinchi va Final o’yinida maydonga tushgan Abdug’aniyev Ilhomjon bilan ham suhbatlashdim.

-  Eng avvalo bizga shunaqa sharoit yaratib bergan Prezidentimizga, hukumatimizga, federatsiyamizga, shuningdek, bizni qo’llab-quvvatlab turgan muxlislarga, yurtdoshlarimizga kattakon rahmat aytaman. Bizga ko’p imkoniyat va sharoitlar yaratib berishdi, ko’plab sborlar (muallif izohi: o’quv yig’in mashg’ulotlari) tashkillashtirildi, biz shulardan unumli foydalana olganimizdan xursandman. 2 yil oldin katta akalarimiz Jahon chempionatlarida yaxshi yutuqlarga erishib, bizga o’rnak bo’lishgandi, biz ularga qarab harakat qilgandik. Chempion bo’lganimizdan keyin, O’zbekiston ham Yaponiya, Koreya, Eron davlatlaridan kuchsiz emasligini isbotlab berdik. Jahon chempionatida ham, Xudo xohlasa, chempion bo’lishga harakat qilamiz.

Shaxsiy izoh:

 Umrimda birinchi marta diktofonni yoqib, kimnidir gapini yozib olishim. Bunaqa intervyu olishlar mengamaskan, rosti :)

Yana bir o’zimni shaxsan quvontirgan narsa (chunki bu holat boshqalarni quvontirmasa kerak), o’smirlar terma jamoamiz a’zolari “Zakovat” Intellektual ko’rsatuvini ham ko’rib borisharkan-ey! Mullado’st!!!

Ol’ga o’smirlar!!! Olg’a Zakovat! :)